منتديات المقاودة ترحب بالجميع

أهلا وسهلا بك زائر في منــــــتدى أبناء المــقـــــاودة
 
الرئيسيةالرئيسية  البوابةالبوابة  اليوميةاليومية  مكتبة الصورمكتبة الصور  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخولدخول  

شاطر | 
 

 كابوس صابر ود أيوب

اذهب الى الأسفل 
كاتب الموضوعرسالة
أمير صالح
المـديـر العـــام
المـديـر العـــام
avatar

ذكر
عدد الرسائل : 103
الجنسية : سوداني
رقم العضوية : 1
علم الدوله :
المزاج :
المهنة :
الهواية :
تاريخ التسجيل : 24/01/2009

مُساهمةموضوع: كابوس صابر ود أيوب   الجمعة يناير 30, 2009 12:43 am

كابوس صابر أيوب
(ست الشاي) (أف. بي. آي)
هاشم صديق

الرادي يساسق بين بريطانيا وبين أمريكا
و(صابر) سارح لي نفسو يصارح
يا صابر هوي
رمضان جاييكا
حتجيب من وين
قروش السكر وحق الويكة؟!
(الرادي) يناهد وسط الحوش
بين (بن لادن)
و(عمر المُلا)
و(مستر بوش)
تصريح من لندن أخبار من (غزة)
وجيران صابر
عاملين (قعدة) انقلبت (ندوة)
في الكأس العاشر (بالعرقي)
الداشر والليل مصبوغ بي رحية (المزة) ...
الرادي يكورك وسط الحوش
-افغانستان موت أفغان -مستر بوش وخواجة بيصرخ
وصوته مرخرخ زي (حنكوش)
-القصف يدك أركان (كابول)
ووالدة (صابر) حاجة (بتول)
مشدوهة تقطع عيش الفتة
تكب سرحانة في موية الفول.
يوماتي عشاهم (فتة بوش)
والرادي يساسق بين (بن لادن) ومستر (بوش)
وصابر يطنطن الصاح مقلوع
السيف مرفوع
الكلمة غموض والمغنى فروع
الدنيا خراب والأقوى مهاب
والعدل رهاب
الليل مشروق بي فتة فول
وصوت (الحاجة)
الوالدة (بتول)
يناغم صابر -شنو الإرهاب؟
ويتمتم صابر قلـ...قلتي شنو؟
وترد (الحاجة) مالك مرعوب؟
تتلفت ليش؟!
تقول مزرور بي عسكر وديش؟!
سألتك بس شنو الإرهاب؟! ...
واتنحنح (صابر)
صنقع ودنقر
حك رويسو اتمدد وصنقر
وقال للحاجة سؤالك يمة جوابو كتاب
لكن.... لكن يا (حاجة) زي ما تقولي
طلع ربّاط في الليل
لي زول بي سيف مسلول
وشال من جيبو قروش العيش
وحق الفول
أو زول آمن يقع في مكيدة
يموت مكتول
وزي تغيان على الفقران على المسكين
على الأعزل على المشلول
وتتدقق غبينة (الحاجة)
زي راجمة وتصبح ناغمة
وحسع نان منو الرباط؟
امريكا؟ .... (بن لادن)؟ ....ولاالأفغان؟
من التغيان منو المسكين؟ منو المظلوم
(مستر بوش ولا فلسطين؟
شنو الـ...... منو الـ.... ضحك (صابر)
وحك رويسو واتنحنح
وقال للحاجة يمة اتعشي
أكلي البوش
لو عارف ردود لي ديل
ما كان الرويس مدووش
سكت صابر رقد معبور
وصوت الرادي
لافي الدنيا لسة بيدور
سرح صابر ودمو يفور
نكش حزنو وقال لي نفسو
من قلبو أريت الدنيا حسه تغور
سمع صوت أمو تاني يلح
دحين يا وليد بدور أسأل؟
ويرد صابر وضيق العبرة طعمو ملح
نعم يمة قايلك نمتى
وترد الحاجة أنوم كيفن
وصوت الرادي في أضني زي مكنة؟!
بدور أسأل دحين أمريكا ما ياها العذابا دنا؟؟!
ويرد صابر
وضحكو علا -عذاب أمريكا ولا هنا؟؟!
عذاب أمريكا ولا أنا؟
ويصن لحظات
دحين يمة ورمضان جاي
هم أمريكا ولا اللقمة والويكة
ترد الحاجة
تفتش لي كيس تُمباكا في الكراب
نقول همين عاب وعذاب
تخت السفة
وتبرطم -دحين يا وليد ده مو الإرهاب؟!!
ويصن الليل
رأس صابر يدقدق ساي
يشرق جاي
يغرب جاي
كراتشي
أباتشي
أنقرة
عنقرة
ربع الويكة
صوت أمريكا
جمرة خبيثة
مكيدة دسيسة
بي. بي . سي
أي. أن. تي سي. أن. أن
توني بلير كلام الطير
خبز وحواشي
إبراهومة أموكاشي
ويقع صابر في بير النوم
ويشوف روحو
بدل (أمجاد) ركب بعشوم
وشاف الناس توسوس ساي
خبر يا هناي ست الشاي أف. بي آي
وأحمد بيه سي . أي. أيه
ووسط الموز لقينا (كروز)
برج كلتوم ملان بحمام
وقع صاروخ شق حشاهو
سكن جواهو سوا حطام
ويغوص صابر
غرق أكتر في بير النوم
ويشوف الحاجة امو (بتول)
وسط الزحمة رافعة أيدها بي قندول
تكورك وتهتف
لا أمريكا بل فتريته)
(أنحنا الساس) رافعين رأس
ما بنتراجع
ما بنتهان
ما بنخاف
الأمريكان
ويشوف صابر
بيوت الحلة تتغامز وتتريق
على الحاجة
وتتلامز ووسط اللمة
صوت الحاجة عالي فصيح
(تشيلو الريح)
صوت الرادي مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن لقيامة تقوم
صابر مجروح في نومو يئن
وفي الرادي تجن بالتار (بيق بن)
والنشرة تجيب أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
كابوس صابر
يعلم أيه
والدنيا مصالح
وسي. آي. أيه
كابوس صابر
الناس بتوسوس وتنضم ساي
ست الشاي أف بي آي
كابوس صابر
الدنيا مغازي
يموت الحب
ترمي أخوك في بطن الجب
وتترتر غادي تناصر
الغازي
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
كابوس صابر
الناس (بالقرجة) تقيف للفرجة
تغير لونها ميتين درجة
كابوس صابر
هم الويكة والفتريتة
ونار أحزانو ونار أمريكا
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلعلغ وسط الحوش
بين (بن لادن)
و(عمر الملا)
ومستر بوش
أفغانستان موت أفغان
قايمة تطول
- عراق..
سوريا -
جنوب لبنان
وما معروف تاني كمان!
تجي الحملة
عقاب جملة (على الإرهاب)
على الإنسان؟!
القصف يدك أركان كابول
ووالدة (صابر) حاجة (بتول)
حلمانة تقطع عيش الفتة
تكب سرحانة في موية الفول
يوماتي عشاهم فتة (بوش)
والرادي يساسق بين
(بن لادن)
ومستر (بوش)
صوت الرادي مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
كابوس صابر
الناس بتوسوس وتنضم ساي
ست الشاي أف. بي. آي
كابوس صابر
صوت مبلوع
حق مقلوع
والموت بالجوع
كابوس صابر
يعلم أيه والدنيا
مصالح وسي. آي. أيه
كابوس صابر
قفة خضار
سوت جنحين
طارت لي فوق
والدنيا مطار
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://almaqawda.alafdal.net
 
كابوس صابر ود أيوب
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات المقاودة ترحب بالجميع :: 
* أدبيـــــــــــــــــــــات *
 :: حلمنتيش
-
انتقل الى: