مكتبة الرائع حميد

يا خالة :

ما تقولى لى دخل البطون
والفى البطون ما بتمرق
يا خالة شيليها الظنون
والله مابينكن فرق
ما زى بعض لوبي الجروف
قوليها لو كان تنطق
خالتى المجنح ما بيطير
واللاحقه ايدك بتلحق
وين انتى شفتيلك بعير
معقول محكم وينطلق
يا خالة كيف اصبح غريب
وأنا روحى من روحك خلق
والله أقرب من قريب
والغنوة معوان للخلق
ما شفتى ناسا حالها كيف
قلب الجبل ليهن برق
كم ليلة ما غمدو الطريف
سدت دموعن فى الحلق
يتباكو ما شفتى النحيب
ساعتو البيبدا من القلب
آه وآشريري على الغريب
اليومى دمعو بينسكب تلقيهو يرفع الليدين
لافوق يلاهى وينضرب
يا الله يرجع لا متين قلباً معذب ومغترب
طعم الدروس يا يمه ليك
لى كل مهاجر ومغترب
ضاق الكؤوس المرة ديك
وآه من حناضلاً تنشرب
مش كل ما لاح صباح
يتماروا ناسك فى الدرب
الجاي وارد واب ملاح
يا بت ترب زولاً تلب
يبقى الغنا السلوى الملاذ
للقلبو فى الساساق غلب
لو صدق المطر الحراز
ما كان من الأشواق تعب
انتى اللسان الماب يقع
فى زلة لا يوم ينزلق
فيض الحنان المن نبع
لا قل لا يوم نتمحق
جاهو الجنوب سابق الشمال
جاهو المشحتف فى الشرق
جاهوالغرب شادى الرحال
شيل يا غمام منو وأسق
يا الله شدة ماك رحيم
أديتنى أُمين تنسبق
لى ضمى بالحضن القديم
الدافى شوق وعشق وعشق

غربه

ورينى شن طعم الدروس مادام بكانا مشى قطر
وكيف ذاتا ترتاح النفوس تقبل قرايتاً فى سفر
يايمه حان الإمتحان من وقتو بس فاضل شهر
ما اظنى من جور الزمان انجح واجيب ليكم نمر
كيف ذاتى يا نبع الحنان انجح من آلام السهر
عمرك سمعتيلك جبان خاض المعارك وانتصر
زينوبة كل ما افتح كتاب القاك فى أول سطر
القى الجداول والصحاب القى الجناين والتمر

فى الحصة عقلى أنا قام سدر يمه المدرس لو فكر
كان بلقى قاعد فوق ككر فى الدونكي لسع ما فطر
يسمع كليمة يا عشاي وأغلى الحكم عند الضجر
أنا قلبى كلو عليك جناى وقلب جناى على حجر
والله موش لو كان نهر لو كالنى بسيطان بقر
مادام عقيل الجن سدر ما اظنو من عندك حضر

بذاتو ابوى تلقاهو قام فاتح كتابو مع الفجر
يقرأ ويرتل فى كلام ما بفهمو الناس الكفر
زينوبة كر من حالى كر قاعد لى فوق نيران جمر
غربة وكمان حالاً فقر عذبنى قبل أصل القبر
الشوق متل شوك الكتر طعن الجسم لمن خدر
والله لو ما بنقبل ما كان بفارقك بى شبر

زينوبة دنيا الإغتراب خلتنى زي ورق الشدر
اتحت من عدم الشراب عم الأراضى وانتشر
الغربة اصلو طعيمها مر لكنى بقعد بالجبر
لمن سنين الهم تمر يا ربى الهمنى الصبر

النخلة

النخلة في الليل المهول ...
وحيدا في عز الرياح
فارس يدارق في الرماح ...
الجايا من كل إتجاه
رغم الجراح ...شح المي ...
الزاد والسلاح
راكز يصول ...لا أنَّ لا حنى للجباه
لا خان بصيرتو الإنتباه
لا حتى قال ديل المغول ... لا خت آه
على عز قديم ... روح عجول
طول مداميك الصبر ...سدابا طاقات النباح
كل ما نزف من جوفو دم ...
كل ما عزف لحنو الصباح
نجم الميامين الحمش
ينضارى شان تشرق شمس
تدي الحياة... الناس ... الحقول
الدابة ... والطير ... والبمش
لكنو ما بخبر أفول ...
والأرض مخلاية التعب
مصلاية العشق الصعب ...ما بتستباح
زي نخلة ... في الليل المهول
كانت بتختبر الفصول
كانت بتمتحن الرياح ... كل ما تطول
والدنيا خوف ... عابر سبيل
يشوف عنف الرياح في النخلة ...
واللا النخلة في عنف الرياح ...
في ليل مهول
طوالي راح يحلف يقول
النخلة ما بترجى الصباح
والطيب الصابر سنين
راجيها باكر ... حقو راح
لا فك دين ... لا سد جوف
رزقو المعلق في الصبيط ...
مشهادو أصبح بين بين
النخلة ما بترجى الصباح
لكن ضراعا في البلد ....
عارف عروق النخلة وين
خابر صمودا المن متين
وسامع مناتقة الرياح ... ساكت صياح
لكن ضراعا في البلد ....
عارف عروق النخلة وين
ضامن ثبات ساقا الهطيط
وسامع مناتقة الرياح ... ساكت صياح
النخلة ما بتقدر تخون الأرض ...
ما بتقدر تكون غير المراح
لي همبريب يغشى البيوت ... عند الصباح
نص النهار ... عند المغيب ... عز الرياح
النخلة تتجاسر تصون عش الطيور
البينا ...تفرد للجناح ...
ما ليها غير تطرح تمور
تملأ الشواويل ... القفاف
ينتم زين ... ينحل دين
يطلق ضهر زولا بسيط
واقف على حد الكفاف
ومن ركة الرزق المتاح
رزقو المعلق في الصبيط
ينزل كما الطير الخفاف ...يقدل نشيط
يخضر زي شتل الضفاف ...
كل ما النشاف بدأ في الصبيط
والنخلة لو عنف الرياح ... الصاقعة
أهوال الفصول ... آفة الذبول ...
قدرت على ساقا الهطيط ... تقع
آ بتموت .......
تلقاها خشت في الببيوت ... بي كل صراح
تبروقة ...سجاجة طهورة ..
طبق من العرجون ... ضنيب هبابة ..
قفة وكسكسيكة ... حبل متين
فتلوهو في ضل الدليب
نشلوبو من بير للشراب
نسجوبو بنبر وعنقريب
تلقاها خشت في الببيوت ... بي كل صراح
حويبل جريد ... يعرش سقف بيتا جديد
أول دخلتو عريس سعيد
مبسوط يقرقر بإنشراح
أو حتى واقودا تقيدو السمحة ...
في نار بارتياح
لي يوم عزيز... يطلع خبيز
نبيذ الليل صفاح
يطلع ملاح ... بروبو ناساتا ضيوف
ولي زول وراهو شغل بعيد ...
جابرا الظروف
يطلع قهيوتو وشاي صباح ...
وآخر المطاف
الموت بيلفح بسمة من توب الزفاف
الموت بشرق نسمة في كل الصبا
النخلة ترباية العباد ...
بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة ...
شوف كيفن بتتحدى الرياح
تصبر على مر الحياة ....
وتنمطق الموت بي جلد
من بعد ما ملت البلد ..شتلا معمر بالألوف
وشايل مخلف بارتياح
طول المصير ... النخلة حوتة الصحرا..
نوارة الجروف
تلقاها في أجمل وشاح
بي جراحا رجتنا الصباح ...
يا القلتو ما بترجى الصباح
النخلة تحت الأرض سر ...
والنخلة فوق نخلة نصاح
والدنيا أوسع ما تكون ... والجو براح
وكل الرياح فوقا بتمر ...
يكفيها دا ... ويكفيها صاح
ما استسلمت لي ريح غريب
وكل الرياح فوق بتمر ...
والنخلة ما بتعرف خلاف ريح اللقاح
والهمبريب ريح الصلاح
يا معوض الليل بالصباح
يا معود النار اللهب ...
روض نخلنا على الرياح
وفي لجة البحر الغريب ...
أدي الرواويس الصلاح
يكفيها دا ... يكفيها صاح

تسلم ايدك ياباشا انا من عشاق الاستاذ محمد الحسن سالم حميد الرائع صاحب الكلمات المعبرة الجميلة لك الشكر على المساهمة الجميلة

ود البلد

حميد هامة تعانق السحاب وراجل فنان عندو حس مرهف
وأفق رحيب عشان كده بيأسر أي زول بي كتاباتو
كل الود

» مكتبة الرائع الدوش
» مكتبة الرائع خالد شقوري