أكون كضَّاب (عبد العزيز العميري )

أكون كضاب
لو اترددت شان أستقبلك جواي
ولو قاومت حد السيف
بريقو بلخبط الهداي

صحيح قبلك
شراع الدهشة ماصفق
ولا كان العِرِق وداي
دي حتى الأغنيات قبلك
حروف أبياته كانت ساي

بس الحاصل
بدورك تسمعي شوية
فترت من السواحل ديك
وغشوني المراكبية
كنت بلملم الضحكات
وحاجز في البياض نية

و لما غلبني ريح الليل
قلت براي اعود واهي
غلبني أساوم الرجعه
ده ليل الغربه متناهي
فيهو الغربه
قبلو الغربه
بعدو الغربه
و الأفق الرقد ساهي
أمد ايديا بس لي وين
أقاوم كيف زمن لاهي

لا نفع التودد فيهو
لاجاياهو حنيه
شتت أملي في الموجات
كسر في العشم جيه
ده كلو من السواحل ديك
و من ظلم المعديه
أنا البعت الفرح للنيل
وغشوني المراكبيه