قصيده ومعني(ماهو الفافنوس)

لحَّنها وغناها الاستاز عبد الكريم الكابلي

ما هو الفافنوس
ما هو القليد البوص
ود المك عريس خيلاً بجن عركوس (عرقوس)
أحي علي سيفو البجز الروس (البحد الروس)
ما دايرة لك الميتة أم رماداً شح
دايراك يوم لقا بي دميك تتوشح
الميت مسولب والعجاج يكتح
أحي علي سيفو البسوي التح

***
كوفيتك الخودة أم عصا بولاد
درعك في أم لهيب زي الشمس وقاد
سيفك من سقايتو استعجب الحداد
قارحك غير شكال ما بقربو الشداد
***
إن وردن بجيك في أول الواردات
مرناً مو نشيط إن قبلن شاردات
أسد بيشة المكربت قمزاتو متطابقات
وبرضع في ضرايع العنز الفارزات
***
يا بقة عقود السم
(يا جرعة عقود السم)
يا مقنع بنات جعل العزاز من جم
الخيل عركسن ما قال عدادن كم
فرتاك حافلن ملاي سروجن دم
( فرتاق حافلن ملاي سروجن دم

طبعا زي ما وضحت فوق القصيده عباره عن مرثيه او مناحه
أولا نشوف معني الكلمات كمفردات
ماهو : طبعاد اداة نفي بي لهجتنا السودانيه
الفافنوس : نبات رخو بينمو علي ضفاف النيل
الغليد : يعني الكبير وهنا مقصود بيها السمين
والبوص : جمع بوصه وهي القصبه الجوفاء
العركوس : يعني التجمع والكثره
طبعا أحي كنايه علي الندم
البجز الروس: جز الشي يعني قطعه من أعلي
الميته: الموت
ام رمادا شح : يعني الموته الساهله البقومو النسوان يكبو الرماد في رؤوسهم
يوم لقا : كنايه عن الحرب
بي دميك تتوشح : مخضب بالدم يعني تموت في الحرب ماموته ساكت
كوفيتك : هي الكوفيه البتتلبس في الراس
الخوده : يقصد بيها الخوذه
بولاد : يقصد بها فولاذ
ام لهيب : الحرب
وردن : أي الخيل حضرن
مرنا : المقصود بيها بطئ
المكربت : عندنا في السودان يعني الجري ودايما بتتقال للحصان أو الحمار)
قمزاتو متطابقات : خطواتو متطابقه

طبعا هنا قالت انو اخوها ده ما زول رخو ولا زول سمين وسجمان زي قصب البوص فاضي من جوه البتتكسر بي سهوله بعد كده وضحت انو هو زول أمير وولد المك نمر طبعا للفخر وعريس خيل يعني فارس .

بعد كده جات قالت ليهو مادايره ليك الميته الساهله العاديه البيبكوك فيها النسوان ويخمو الرماد عل راسهم ودايراك تموت في ارض المعركه وانت مليان دم ومتوشح بي دمك

بعد كده جات للفخر وقالت في حالة الكر وورود الخيل بيكون هو أول المتقدمين في الصفوف وده طبعا دليل الشجاعه والاقدام اما في حالة الفر فبيكون هو آخر واحد وده البتقصدو بي مرنا مو نشيط ان قبلن شاردات وجات توصف الكوفيه اللابسها وقالت كأنه خوذه قويه من الفولاذ

والرع بتاعك في ام لهيب اي الحرب بيلمع مع الشمس

بعد كده جات وشبهتو بي جرعة السم المركز والبيقرب منو كلو بيموت طبعا من الاعداء

وانو هو الفارس والحارس لي كل بنات قبيلة الجعليين وهي القبيل المشهوره بالفروسيه ورفض الظلم و( ما بترضي بالحقاره ) ولمن الخيل والفرسان يخشو ميدان المعركه مابيهمو عددهم كم ولا عتادهم شنو من شجاعتو وبيقوم يخش في نصهم لمن يفرتق لمتهم دي وما كده وبس يملا سروجهم دم ودي كنايه عن انو بيقتل الفرسان والخيل دي بترجع بي سروج مليانه دم وبدون فرسان .

» ماهو الطب